نسيم العاصف بقلم زهرة الربيع

وقال فيه إيه؟ أنتي مخبية عني حاجة؟! أنتي تعرفي حاجة عن الهبل اللي قالته؟
نسيم بصت لنوجه بخوف، ونوجه قالت بسرعة الأكل على النار عن إذنكم! ونزلت جري.
نسيم بصت لطيفها بغيظ وقالت جبانة!
عاصف قال بغضب ردي عليا.. فيه إيه يا نسيم؟
نسيم اتنهدت وقالت عاصف.. عاصف أنا هحكيلك كل حاجة.. أنا أعرف طنط سلوى من زمان هي صديقة ماما الله يرحمها، وهي طلبت مني إني أعمل خدامة هنا وأنها هتقولك على حوار الأطفال ده علشان تتجوزني.
عاصف انذهل باللي قالته وقال أنتي بتقول إيه؟! ماما هتعمل كده ليه؟
نسيم قالت بحرج علشان هي اكتشفت أن مراتبك مخبية عنك أنها مش بتخلف وأنها شايلة الرحم من قبل ما تعرفك، وكانت عايزاك تطلقها من غير ما تقولك وتجرحك.
عاصف اتصدم جداً باللي بيسمعه وبقى مش مصدق ودانه وقال أنتي.. أنتتي أكيد بتخرفي! أنا.. أنا مستحيل أصدق الهبل ده! ولف شوية في الأوضة ووقف قصادها وقال أنتي عايزة تفهميني أنك استملتي الإهانات دي كلها واتجوزتيني بالطريقة دي علشان أمي طلبت منك؟!
نسيم اتنهدت ونزلت دموعها وقالت والله ما بكدب عليك يا عاصف.. ده اللي حصل والله.
عاصف بصلها بحدة وقال أنا غلطت من الأول إني صدقتك وصدقت أنك بنت مسكينة، وأنا الغبي اللي فكرت أن ظروفك تعبانة وعندكم مشكلة محتاجة علشانها الفلوس.. مكنتش متخيل أنك عاملة مؤامرة علشان نتجوز صحيح!
نسيم نزلت دموعها وقالت ببكا أرجوك اسمعني والنبي تسمعني أنا...
بس عاصف قال بغضب رهيب أنتي إيه؟! أنتي واحدة كدابة! بس أنا اللي غلطت إني صدقتك.. أنتي طالق يا نسيم!
قال كده ومشي بغضب وسابها، ونسيم قعدت وبقت تبكي جامد.
عند عاصف، مشي وراح لبيت نيفن بغضب.
عند نيفن، كانت قاعدة قصاد سلوى اللي كانت بتبصلها بغضب وقالت خليهم يسيبوني أمش يا نيفين، انتي أكتر واحدة هتبقى خسرانة في اللي بيحصل ده.
سلوى بصت لها بغضب وقالت أنا ابني هعرفك إزاي أرجعه ليا.. بس صدقيني يا نيفين لما يسألني عملت كده ليه، انتي أكتر واحدة مش هتبقى مبسوطة بإجابتي!
نيفن اتصدمت وبقت تبصلها بذهول، وقبل ما ترد وصل عاصف ودخل بغضب.
نيفن بصلته بتوتر وقالت عاصف حبيبي أنا.. أنا وطانط كنا لسة في سيرتك.. يا رب تكون رجعت لعقلك وطلقت البنت اللي معاك.
عاصف بصلها بغضب وقال أنا فعلا رجعت لعقلك وطلقتها!
سلوى اتنهدت بحزن ودموع، وعاصف قال وهطلقك أنت كمان.. أنت طالق يا نيفين! مش عايز أشوف وش واحدة كدابة زيك تاني!
نيفن قالت بسرعة لا.. لا يا عاصف أرجوك اسمعني الأول أنا عملت كده علشان أنت متزعلش و...
بس عاصف قاطعها اخرسي! إياكي أسمع صوتك أو أشوفك في حياتي أصلاً.. ومتحاوليش معايا تاني.. خلاص كده أنا وأنتي خلصنا!
نيفن قعدت وبقت تبكي، وعاصف بص لامه بدموع وقال وأنتي مش هقدر أعمل معاكي حاجة، مع أنك أكتر واحدة وجعتيني.. مكنتش لازم تخبي عني.. أحسن ما أفضل مصدقها.. لا وكمان جايبة واحدة معاكي تكدب عليا.. يلا يا ماما علشان أروحك مابقاش له لزوم الكلام.
سلوى مشيت معه بدموع وروحوا البيت سوا.
عدوا شهر وكل حاجة فيه اتغيرت، عاصف بقى يشغل نفسه بأي حاجة علشان ينسى نسيم وكان طول وقته في الشغل.
أما نسيم فكانت سابت البيت ومشيت من يوم ما طلقها ومشافش عاصف خالص، بس كانت كل يوم تسأل عليه والدته.
لحد في يوم نزل عاصف الصبح رايح الشركة زي كل يوم، وقفته والدته وقالت عاصف استنى.
عاصف وقف وقال نعم يا ماما؟
سلوى قالت حبيبي تعرف مين سأل عليك النهارده كمان؟
عاصف اتنهد وكان متأكد أنها نسيم، وكان بيتمنى يسأل عليها وأعرف أي خبر عنها بس قال بضيق تاني الموضوع ده يا ماما؟! قولتلك مش عايز أعرف مين بيسأل.. مبقاش يهمني.
سلوى قالت بدموع يا حبيبي أنا السبب! أنا اللي جبتها وقولتلها تعمل خدامة، وأنا اللي اخترعت قصة جدك وقصة الورث والحفيد، أنا عملت كل ده كنت عايزة أخلصك من العقربة اللي اسمها نيفين بعد ما عرفت أنها بتكدب علينا.. نسيم ملهاش ذنب!
عاصف قال بغضب ذنبها أنها خبت عني وخدعتني! وأنتي سامحتك لأنك أمي، بس مش مضطر أسامحها!
قال كده ولسه هيمشي، وقفته أمه وقالت بسرعة نسيم حامل يا ابني!
عاصف وقف بذهول شديد، وسلوى قالت البنت عايشة لوحدها كل أهلها مقاطعينها علشان اتجوزت من وراها، ولو دلوقتي الناس عرفت أنها حامل محدش هيرحمها.. محدش هيصدق أنها كانت متجوزة!
عاصف كان واقف بذهول وسعادة الدنيا في قلبه، حاول يسيطر على فرحته وقال بجمود مصطنع أحم.. وأنا.. أنا مالي؟
سلوى اتنهدت وقالت عاصف أنت طول عمرك ذكي جداً، حاول تفكر بس بعقلك وتقولي إيه اللي يخلي بنت صغيرة وجميلة ومن عيلة زي نسيم تشترك في اللعبة دي وتغامر بسمعتها وأهلها وتستحمل إهاناتك دي كلها وتعمل نفسها خدامة وهتتجوز علشان الفلوس؟!
عاصف لما قالت كده انتبه لكلامه.. كانت فعلاً دي الأسئلة اللي مش لاقي لها إجابة! فهم أن نيفين خبت موضوع عمليتها علشان تتجوز، وفهم أن والدته عملت كده علشان تحميه.. إنما نسيم ليه وافقت على لعبة هي أكتر واحدة خسرانة فيها؟ ده اللي مش لاقي له جواب.
بس اتصدم بإجابته لما أمه قالت نسيم بتحبك أوي يا عاصف.. بتحبك من زمان.. كانت تجي تقعد عندي بالساعات علشان تشوفك بس وأنت داخل وخارج، كانت بتعشقك من قلبك وأنت عمرك ما خدت بالك ليها حتى.. رغم أنها كل يوم كانت عندنا بس عمرك ما قولتلها كلمة! أنا.. أنا لما قولتلها وافقت من غير تردد على أمل أنك ممكن تحبها زي ما بتحبك.. أرجوك يا ابني متعملش فيها كده!
عاصف كان صدم بكلامه وقال بتحبني؟! نسيم بتحبني؟!
عاصف طلع جري وركب عربيته وطلع على عنوان نسيم اللي أخده من والدته.
بعد شوية وصل بيت نسيم، وكانت قاعد في بيت جميل صغير في منطقة معزولة، قعدت فيه بعيد عن أهلها لأنهم قاطعوها.
عاصف دخل ولقاها بتسقي الورود، ابتسم وقال ممكن أعرف مراتي فين وسط الورد ده لأني مش واخد بالي؟
نسيم وقع الأبريق من إيدها وبصلته بذهول، ونزلت دموعها وابتسمت بفرحة رهيبة وهي مش مصدقة عينها وقالت عاصف! وجريت عليه، بس قبل ما توصله وقفت وبلعت ريقها ونزلت دموعها بحزن وقالت أحم.. أنا.. أنا مش مصدقة أنت قدامي!
عاصف قرب منها وقال بدموع ولا أنا مصدق أن فيه واحدة ممكن تحبني بالشكل ده! مش مصدق أنك عملتي في نفسك كده علشان بتحبيني أنا.. أنا أسف.. أسف سامحيني.. سبتك لوحدك بعد ما خسرتي كل حاجة بسببي.
نسيم نزلت دموعها وقالت متقولش كده.. أنا كان لازم أحكيلك.. أنا كمان أسفة خفت تبعد عني.. كنت عايزك معايا ومش مهم الباقي.
عاصف ضحك ومسح دموعه وقال أنا فاكر الجملة دي كويس.. كنت كل ما أدخل وألاقيها المطبخ تقوليلي حرام احنا مش متجوزين!
نسيم ابتسمت وقالت دي الحقيقة.
عاصف وقف قصادها وقال بحب الحقيقة الوحيدة أنك قلبي وعمري وروحي.. ومعرفتش أعيش ولا حسيت بطعم الفرح والحزن والشوق واللهفة غير على إيديكي! أوعدك هتفضلي جنبي وهعوضك عن
كل دقيقة أتألمتي بسببي فيها.
نسيم ابتسمت ودموعها بقت تنزل بفرحة رهيبة وقالت دي أمنيتي الوحيدة يا عاصف.
عاصف قال بحب كل أمنياتك حققهالك، وهاخدك من إيدك وأصالحك على أهلك، مش هخلي نفسك في حاجة.. حتى حفلة ماجد هتروحيها!
نسيم ضحكت بفرحة، وعاصف قال بابتسامة أيوه كده.. اضحكي ديماً يا نسيمي، اللي خلى حياتي جنة!