طليقـه زوجـي بقلـم حكايات منـال علي

أسنان ناجح.. هو نصاب بدرجة دكتور! أنا اكتشفت ده متأخر، بعد ما خلاني كتبت يوسف باسمه عشان يداري على عيلته، وهددني بالولد لما حاولت أبلغ زمان. بس لما طلقني وطمع فيكي عشان ورث أبوكي.. عرفت إنه مش هيقف عند حد، وإن الدور عليكي وهيبيعك ويسافر.
عمر صرخ في سلمى وهو بيجروه حراااام عليكي يا سلمى! دمرتيني! دمرتيني!
سلمى مالت عليه قبل ما يطلعوا بيه وقالتله بهمس سمعه كل اللي في الأوضة إنت اللي دمرت نفسك يوم ما نسيت إن ربنا ما بيرضاش بالظلم.. يوم ما استكترت عليا اللقمة الحلال وفضلت تنهب في الناس، ويوم ما فكرت إن الستات مجرد فريسة لفلوسهم.
أخدوا عمر.. اتسحب مكلبش من وسط العمارة، وسط فضيحة رنت في الشارع كله. الشارع اللي كنت بمشي فيه رافعة راسي وفخورة إني خطفت دكتور العيادة الشيك من مراته.
الباب اتقفل.. والشقة بقت فاضية، مفيهاش غيري أنا وسلمى، ويوسف الصغير اللي كان واقف مستخبي ورا ضهر أمه وماسك في عبايتها وخايف.
وقعت على ركبي في نص الصالة. عيطت.. عيطت بقهر ووجع عمري ما حسيته. مش عشان خسرته.. أنا عيطت لما شفت حقيقتي في المراية. أنا مكنتش الضحية بس.. أنا كنت الجانية برضه.
بصيت لسلمى وأنا بنتحب أنا.. أنا اللي خربت بيتك يا سلمى. أنا اللي فكرت إني شاطرة، وجريت وراه.. أنا استاهل كل اللي حصلي ده.
سلمى سكتت شوية، وبعدين قعدت على طرف الكرسي قصادي، وقالت بصوت هادي ومرزوق إنتِ غلطتي يا رنا.. غلطتي لما سمحتي لنفسك تبني سعادتك على أنقاض بيت واحدة تانية..
سكتت ثانية وطلعت ورقة تالتة من الشنطة بس أنا مكنتش جاية أشمت فيكي.. أنا ست وعارفة يعني إيه غدر. عقد بيع الأرض وتنازل التوكيل اللي وريتهولك في الظرف؟ ده مكنش مسجل لسه في الشهر العقاري.. المباحث وقفت التحويلات كلها من حسابه قبل ما يسحب مليم، ومحامي النيابة هيقدملك طعن ببطلان التصرف عشان كان فيه نصب وتدليس، وأرض أبوكي هترجعلك كاملة.
برقت بعيني وأنا مذهولة هترجعلي؟! وإنتِ.. إنتِ بتعملي معايا كدة ليه بعد اللي عملته فيكي؟!
سلمى قامت، مسكت إيد ابنها يوسف، وبصتلي نظرة مش هنساها طول عمري عشان يوسف. عشان عايزه ابني يكبر يلاقي أمه نضيفة، مبتاخدش حقها بالوساخة ولا بالظلم. أنا جيت أكسر عمر عشان ده حقي وحق يوسف.. لكن إنتِ، ذنبك تكفّري عنه بينك وبين ربنا مش معايا أنا.
فتحت الباب وخرجت. خطواتها كانت واثقة، راسها مرفوعة، وسابت وراها ريحة واحدة قوية انتصرت لكرامتها من غير ما تتنازل عن أصلها.
عدت شهور.. عمر اتحكم عليه بالسجن المشدد في قضايا النصب والأدوية المهربة وتجارة المحظورات. أرض أبويا رجعتلي بعد معافرة في المحاكم وإلغاء التوكيل، ورفعت قضية خلع وكسبتها.
رجعت لشقتي القديمة في عين شمس، مع أمي. شقتي المتواضعة اللي كنت بستعر منها وعايزة أهرب منها بأي تمن. بقيت ببص لنفسي كل يوم في المراية، وأفتكر كل لحظة.
اتعلمت الدرس.. بس بالتمن الغالي أوي. اتعلمت إن البيوت مابتتبنيش على الخراب، وإن كما تُدين تُدان مش مجرد مثل بنقوله.. دي حقيقة بتلف الأيام وتتردلك في نص وشك.
تمت.