درس العمر بقلم: منى السيد
المحتويات
السوبر ماركت، وإيصالات الأقساط. كانت عارفة إن رامي بيقبض أربعين ألف جنيه في الشهر، وهي مرتبها كان حوالي اثنين وعشرين ألف. يعني نظرياً، الراجل بيقبض الضعف فعلاً، وده الرقم اللي كان نافخ ريشه بيه وسط الشلة. لكن الورق اللي تحت إيد مريم مبيكدبش، والمصيبة إن الورق كان بيقول كلام يفضح المستور.
رامي من أول ما اتجوزوا وهو مقتنع إنه شقيان ومصروفه تقيل على البيت، بس الحقيقة المرة إن رامي مكنش بيبص هو بيصرف إيه وعلى إيه. مريم هي اللي كانت بتدير الميزانية؛ بتسدد أقساط العربية بتاعته من غير ما يحس بالخنقة، بتدفع اشتراكات البيت، الفواتير، الغاز، الكهرباء، النت، جمعيات القسط بتاع التكييفات، وحتى البقالة بتاعة الشهر كانت بتطلبها بعروض وخصومات وتوفر فيها بالقرش.
بس الكارثة اللي عين مريم وقعت عليها وهي بتراجع حساب كارت المشتريات المربوط بالحساب المشترك بينهما مكانتش مصاريف عادية. لقيت سحوبات وتحويلات غريبة على مدار التلات شهور اللي فاتوا. فواتير كافيهات فخمة في الشيخ زايد والتجمع بأرقام تخض؛ قعدة قهوة بألفين جنيه، عشا بسبع آلاف، وفوق كل ده، كان في سحب نقدي متكرر بمبالغ كبيرة، وتحويل شهري ثابت بمبلغ عشرة آلاف جنيه لحساب بنكي تاني خالص.
فضلت مريم باصة للشاشة، ودقات قلبها بتدق في ودنها زي الطبلة. مسكت الموبايل، وفتحت تطبيق البنك، وراجعت رقم الحساب اللي بيتحوله كل شهر. فتحت سجل محادثات قديمة كانت بينها وبين رامي، واكتشفت المفاجأة رقم الحساب ده يخص مين؟ يخص معتز، أخو رامي الصغير!
معتز كان شاب عاطل، مبيكملش في شغلانة أسبوعين على بعض، داير من كافيه لكافيه بعربيات أصحابه، وكل ما يتزنق يرمي حموله على رامي، ورامي عشان يعيش دور الأخ الكبير العتر الصراف كان بيبعتله ويسددله فواتير مصايبه من فلوس الحساب المشترك اللي مريم بتدب فيه تلتين مرتبها كل أول شهر كتحويشة للمستقبل وللشقة الملك اللي كانوا ناويين يشتروها!
سندت مريم ضهرها لورا، وأخدت نَفَس طويل خرج سخن زي النار. رامي كان بيعمل فيها بطل قومي، وهو في الحقيقة عايش على فلوس مريم اللي بتسند خرم جيبه المخروم، وفوق ده كله طالع يتفاصح عليها بكلام محمود المزور! مسكت القلم، وشطبت على كل حاجة ببرود غريب، وقالت في سرها بقى كده يا سي رامي؟ بتعايرني بلقمتك اللي أصلاً مش باقية منك؟ وحياة أمي لأربيك بالورقة والقلم ومن غير خناقة واحدة.
تاني يوم الصبح، صحيت مريم الساعة ستة، لبست طقم شيك جداً، وحطت ميك اب خفيف، ونزلت على الشغل وهي رايقة على غير العادة. لا عملت فطار، ولا ولعت على شاي، ولا بصت في وشه حتى لما صحي ولقاها خارجة من باب الشقة. رامي صحي متلخبط، بطنه بتصوصو، والبيت هادي زيادة عن اللزوم. دخل المطبخ، ملقاش فنجان القهوة بتاعه جاهز زي كل يوم. حاول يعمل لنفسه بيض، كسر بيضتين في الطاسة، نص القشر وقع جوه السمنة، ولما جه يقلبهم اتحرقوا وريحة الشياط ملّت الشقة. رماهم في الحوض بعصبية، ساب الطاسة مكانها من غير غسيل، ونزل جري عشان يلحق شغله وهو مبرطم وغضبان.
عدى أول أسبوع، ورامي كان ماشي بمبدأ العند، فاكر الموضوع لعبة يومين وخلاص. مريم كانت مقسمة خطتها زي الساعة السويسرية بالظبط
أول خطوة فتحت حساب بنكي منفصل تماماً باسمها هي بس، وحولت عليه جزء كبير من مدخراتها اللي كانت حاطاها في الحساب المشترك كوديعة طارئة باسمها، وسابت في الحساب المشترك نصيبها العادل بالمليم من مصاريف البيت الأساسية؛ إيجار الشقة، نص فاتورة الكهرباء والنت والمياه، ونص مصاريف الصيانة للبواب.
تاني خطوة بطلت تشتري خزين البيت للأسبوعين والشهر زي ما كانت بتعمل. بقت تشتري أكلها هي بس؛ علبة زبادي، سلطة جاهزة، فاكهة، وسندوتشات خفيفة تاكلها في الشركة أو في أوضتها بهدوء.
رامي بقى يرجع كل يوم مهدود، يلاقي التلاجة مفيهاش غير خضار ني عايز طبخ، وعلب مريم الخاصة اللي لازقة عليها ورقة صغيرة بخط إيدها خاص بمريم.
أول كام يوم، رامي كابر أنا رامي الباشا، هقعد أتحايل على أكل البيت؟ غوروا إنتو وأكلكم! بقى يفتح أبلكيشنات الدليفري؛ يطلب وجبات برجر فخمة، وبيتزا عائلية، وشاورما سوري، وقهوة ستاربكس كل يوم الصبح في طريقه للشركة. كل يوم كان بيصرف في الأكل والشرب بس مش أقل من ثمنمية لألف جنيه، وهو مش واخد باله. الكارت في إيده وبيدوس دفع من غير ما يبص على الرصيد.
في المقابل، البيت بدأ يضرب يقلب. مريم كانت بتدخل أوضتها تنضفها، تغير ملايتها، تمسح مكتبها، وبتغسل هدومها هي بس في الغسالة الأوتوماتيك، وتنشرها على المنشر الصغير جوه أوضتها! أما بقية الشقة؟ الصالة بدأت تترب، الزبالة في المطبخ اتكومت، والحوض اتملى بالأطباق والمعالق اللي رامي بيستخدمها ويرميها فيه، لحد ما ريحة المطبخ بقت لا تطاق، والدبان بدأ يحوم حوالين الحوض. هدوم رامي المتسخة بقت جبال فوق كرسي الأنتريه، قمصان الشغل بتاعته اتكرمشت وبقت ريحتها عرق، ومبقاش لاقي شراب نضيف يلبسه الصبح!
في اليوم العاشر من الشهر، دخل رامي على مريم وهي قاعدة بتقرا كتاب في الصالة بمزاج رايق. رامي وشّه كان باهت، وقميصه كان مكرمش بطريقة تفضح، وكان باين عليه الإرهاق. وقف قدامها وقال بنبرة فيها عصبية مدارية إيه القرف ده يا مريم؟ إنتي شايفة منظر المطبخ عامل إزاي؟ إنتي إزاي مستحملة تقعدي في البيت وهو زريبة كده؟
قفلت مريم الكتاب بهدوء، حطته على رجلها، وبصتله ببرود والله يا رامي، نص الشقة بتاعي نضيف وبيبرق، أدخل أوضتي كده شم ريحة المعطر. المطبخ بقى مش مسؤوليتي لوحدي، إنت بتاكل وبتشرب وبترمي حاجتك، إيدك مش مكسورة، شيل قرفك ورا نفسك.
صرخ رامي أنا راجل بشتغل طول النهار! مش هرجع أمسك سلكة مواعين بعد تسع ساعات شغل! وأنا بشتغل عشر ساعات وبسافر التجمع كل يوم رايح جاي في الميكروباصات، مش زيك راكب عربيتك بمكيفها. وبعدين مش إنت اتفقت معايا؟ كل واحد يشيل شيلته؟ ولا كلام القهاوي بيطير في الهوا لما بيوصل لحد التنفيذ؟
بلع رامي ريقه، وعينيه لمعت بالغيظ، بس مقدرش يرد عشان الرهان اللي حطه على نفسه. قالها وهو بيجز على سنانه بسيطة.. أنا مش محتاجك أصلاً، بكرة أطلب واحدة تيجي تنضف البيت وتطبخ وتغسل الهدوم، وماليش دعوة بيكي خالص!
ابتسمت مريم بخبث وهي عارفة التكاليف كويس يا ريت، فكرة ممتازة برضه!
تاني يوم، رامي جاب ست تنضف الشقة. طلبت ستمية جنيه عشان تنضف البلاوي اللي في المطبخ والصالة، وأخدت خمسمية تانية عشان تعمل له أكل يكفيه تلات أيام. دفع وهو مبتسم نص ابتسامة قدام مريم كأنه انتصر. بعدها لم قمصانه وبدله كلها ونزل وداها الدراي كلين، وخرج دافع ألف وميتين جنيه عشان غسيل ومكواة مستعجل. مريم كانت بتعد في سرها كده ألفين وثلثمية جنيه طاروا في نص يوم.. تمام يا بطل، كمّل وريني.
المصيبة الحقيقية بدأت تظهر في نص الشهر، وتحديداً يوم ١٧. رامي قاعد في الشغل، تليفونه رن؛ كان أخوه معتز إيه يا رامي يا حبيبي، فينك؟ القسط بتاع الفيزا
متابعة القراءة
