أخت جوزي بقلم جيجى حصريا لمدونة لمحه
أخت جوزي بقلم جيجى حصريا لمدونة لمحه
داليا أنا خلاص عدتي خلصت يا حماتي وهروح عند أمي وأخد ابني معايا بقى هتوحشوني قوي. منيرة ليه يا بنتي خليكي معانا إحنا قصرنا معاكي في حاجة بس تمشي ليه؟ داليا لا بس الحق مايزعلش وأنا حقي أعيش يا حجوجه أنا صغنونة وحلوة والعمر قدامي وعايزة أتجوز بصراحة كدا. منيرة بصدمة إيه تتجوزي هو إنتي لحقتي يا بنتي دا إنتي معداش على موت جوزك سنة دا إنتي يدوب بقالك أربع شهور وعشر أيام! داليا وعشر أيام.. يعني عدتي خلصت خلاص أشوف نفسي أنا بقى، وأنا مش هنساكي هبقى أخليكي تكلمي حفيدك في التليفون متقلكيش. منيرة بس يا بنتي دا اللي بقالي من محمود أبوس إيدك سيبيهولي متخديهوش مني، أتجوزي بس سيبيلي الولد أنا هربيه. داليا إيه أسيبلك ابني بتاع إيه لا طبعا، بس خلاص في حل حلو ويقعدني معاكو على طول مش بس سنة أقولهولك. منيرة إيه أي حاجة إنتي عيزاها أعملهالك بس الولد يفضل معانا. داليا أعملي زي كل الناس ما بتعمل وجوزيني أخوه نصار. منيرة بصدمة إيه؟ داليا إيه هو أنا أول واحدة جوزها يموت وتتجوز أخوه? منيرة لا بس نصار متجوز وبيحب مراته. داليا الشرع حلل أربعة، ومراته لازم تفهم إنه هيتجوز عشان ابن أخوه ميبعدش عنكم.. يا يرضى ابن أخوه اليتيم يا يرضى مراته بقى أو ميقولهاش يمشيها بيتها ونتجوز ويبقى الجواز بينا إحنا التلاتة بس أنا راضية. منيرة بس دا موضوع عاوز وقت مش خبط لزق كدا يا بنتي. داليا ماشي هديکي النهاردة فكري فيه ورديلي بكره لو متجوزناش همشي بالإذن يا حماتي.
ودخلت أوضتها وقالت عملت اللي في دماغي برضه وهتجوزك يا نصار اللي كان مانعك عني خلاص مات.
دي داليا دكتورة تحاليل، نبتدى الحكاية من الأول قبل وفاة جوزها؛ جه جوزها محمود وقال بفرحة أخويا راجع من السفر النهاردة. داليا حمدلله على سلامته. محمود هو محضرش الفرح بتاعنا عشان المنحة بتاعته أصل هو متفوق جدا جدا في دراسته. داليا آه جد.. أهو تتعرف عليه بقى. محمود أكيد هتحبيه جدا فوق الوصف، يلا أهو جه تعالي هعرفك عليه هو ومراته.
ونزلو وقال دا دكتور نصار أخويا وحبيبي وابن كمان. نصار حب قلبي بس متقولش ابني لتكبرك قدام المدام بتاعتك. محمود ياض الكبير كبير مقامه. نصار يا نهار إسوح كدا إنت هتصغرني قدام المدام بتاعتي. محمود ههههه مش بقولك مسخرة.
ومد إيده وقال اتشرفت بيكي يا مدام داليا دي نهى مراتي. داليا بصتله بإعجاب بس قالت أهلاً وسهلاً. نصار شد إيده وقال احم نهى دي داليا مرات محمود. داليا أنا دكتورة تحاليل. نصار آه أخويا قالي. داليا ومرارتك دارسة إيه؟ نهى لا مش بشتغل أنا مكملتش علام أصلي أهلي ظروفهم المادية مكنتش قد كدا. نصار مين قال كدا إنتي أكبر مافيا في البلد ورئيسة إجرام وناجحة بجدارة قتلتي في عيني ستات الأرض كلهم. نهى قالت بكسوف تؤ أهلك واقفين. محمود وحلنجي وأونطجي بس وحشني.
وحط إيده على كتفه ومشى بيه وهو بيقول جهزولنا الغدا بقى. واتغدوا وكانت داليا قاعدة مع أختها في الأوضة لوحدهم وبتقول يا بنت بقولك قمر بصي ممثل من بتوع التلفزيون بتوع هوليود وبوليود حاجة كده إيه قيمة وسيما. أختها يخرب بيتك إنتي مش متجوزة يا ولية. داليا متجوزة إيه حسرة عليا إنتي أصلا ما شفتيش أخوه وهو جاي بالبدلة والنظارة وکارر الشنطة وراه، لا وايه مراته فلاحة جاية من تحت الجاموسة، أقدار هي تاخد الدكتور وأنا دكتورة التحاليل أخد مدرس. أختها مالهم المدرسين بيكسبوا والحمد لله ده جوزك الدروس اللي بيديها كفاية، بعدين جوزك شكله مش وحش ماله كان عاجبك وكنتي طايرة بيه. داليا أصلك ما شفتيش أخوه الدكتور بيني وبينك كده عيني منه. أختها يا فضحيتي عينك من مين يا بنت المهبوشة إنتي الراجل متجوز مش عايزين فضايح وأخو جوزك يخرب بيتك استعيذي بالله وأعقلي.
عند نصار كان بيرص هدومه في الدولاب مراته قالت هو إحنا هنمشي إمتى. نصار هههه هو إحنا لسه جينا عشان نمشي إنتي اتضايقتي. نهى لا بس متتكلمش مع مرات أخوك كتير بصاتها ليك ترتني. نصار بلاش هبل دي مرات أخويا يعني أختي بلاش غيرة المجانين دي ونامي أنا هنزل أعمل قهوة.
ونزل بس لقى داليا هناك كانت بتغسل الكوبيات اللي شربوا فيها هي وأختها بعد ما أختها روحت، أول ما شافته قالت إيه جاي هنا ليه عايز حاجة. نصار أنا هعمل قهوة أعملك معايا. داليا بدلع الهوي بنفسك لا ارتاح إنت أنا أعملهالك بعيني. نصار بصلها وقال قاصد يلفت انتباهها تسلم عينيك.. يا مرات أخويا هيا بس نهى مراتي تعبت من السفر فريحت شوية وأنا دماغي مصدعة شوية فنزلت أعملك كوباية قهوة معايا ولا هتطلعي لجوزك. بس اتفاجئ أما قالت لا أعملي هو إنتي إيه اللي عجبك في مراتك يعني دكتور زيك ما أخدش دكتورة ليه. نصار بحزم أنا بحب نهى مراتي هو مش لازم تكون مكملة تعليمها ظروف أهلها منعتها القلب مش مكتوب عليه للمتعلمين فقط عن إذنك. وسابها وطلع أوضته.
تاني يوم بالليل كانت داليا قاعدة لقيته راجع من الشغل وماسك في إيده علبة، تقدمت عليه وقالت ازيك يا نصار إيه اللي في إيدك ده. نصار دي هدية لمراتي أصل أنا زي النهاردة شفتها أنا كل يوم في السنة زى دا أجيبلها هدية. داليا عيد جوازك. نصار لا عيد الجواز ده باخدها ونسهر بره وبنعمل احتفال، ده اليوم اللي شفتها فيه. داليا لا هو إنت بتجيبلها كم هدية في السنة على كدا. نصار أربعة ولا خمسة على حسب بجيب واحدة في عيد ميلادها وواحدة في عيد جوازنا وواحدة في اليوم اللي شفتها فيه. داليا دول تلاتة بس. نصار ما هو لو في مرة في السنة أو مرتين بنتخانق سوا فبجيبلها هدية عشان أصالحها بيها، يلا عن إذنك عشان أطلع لمراتي. وسابها وطلع وهو بيصفر برواق، وهي اتنهدت بضيق وقالت حظوظ ناس ليها السفر والخروجة والهدايا وناس ليها المرمطة مع العيال وحماتها، صدق اللي قال ناس عايشة وناس بايشة، منك لله يا جوزي كان فين عيني لما أخدته كان فين نصار لما أخدت أخوه.
واتصلت بجوزها وقالت إنت فينك أتأخرت بره ليه. بس جالا صوت واحد غريب بيقول صاحب التليفون ده عمل حادثة ودخل المستشفى دلوقتي لو تعرفيه ممكن تبلغي حد من أهله. داليا يا مصيبتي الحقي يا حماتي الحقني يا نصار. نزل نصار وقال إيه يا مرات أخويا في إيه. داليا أخوك عمل حادثة ونقلوه على المستشفى. نصار بصدمة إيه نهار إسود يا رب يا رب.
وراحوا بسرعة على المستشفى ودخلوا كلهم بس طلع الدكتور وقال والله إحنا حاولنا كتير عملنا كل اللي علينا بس هو تعبان شوية وما فيش حاجة نعملها هنا تقدروا تاخدوه معاكوا البيت
