جوزي ضربني

رحت عملت تحاليل وسونار وكشفت وحماتي راحت تجيب التحاليل وجتلي وكريم موجود وبصتلو وقالت الف مبروك يا حبيبي مراتك حامل.
الله مالكو يا ولاد في اي مالك يا كريم متنح؟
كريم وهو مش قادر يتكلم ماما انتي قولتي اي؟
قولت مراتك حامل يا كريم.
اتجننت.. لا طبعا مستحيل.
ليه يعني وبعدين هو انا جايبه التحليل من عندي، ده انا حتي لسه فاتحه الظرف دلوقتي.
التحاليل دي اكيد مش بتاعتي ممكن تكون نتيجة حد تاني، نتيجة ضحي مثلاً.
ضحي ايه بس، اولاً ضحي معملتش اختبار حمل، واللي متعرفهوش كمان أن ضحي عندها مشكله ف الخلفه، اومال قاعده كل ده مبتخلفش ليه اديلها تلت سنين.
يعني اي الكلام ده؟ لا المعمل ده مش أمين ف نتايجه انا هنزل بنفسي واروح أحلل تاني ولا هطربقها فوق دماغهم.
والله مانا عارفه انتو مدايقين كده ليه، هه أما اقوم مبروك يا كريم وربنا يهدي سرك يابني.
وقامت بكل هدوء ومشيت وسابتلي انا هدوء ما قبل العاصفه. قفلت الباب وراها وجريت عليه
كريم كريم الكلام ده مش حقيقي اكيد في حاجه غلط.
هو باصصلي وساكت بس البصه بتقول أنه بيجمع حاجه وأنه باصصلي بنظره مش حلوه.
كريم بتبصلي كده طب تعالي ننزل المعمل ده واحلل تاني ولا نروح نشوف اي الحكايه وطاوعني.
ونزلنا فعلا ع المعمل وانا داخله بعزم ما فيا، كانت البت اللي سحبتلي موجوده ومعاها واحده تانيه، فضلت ازعق
انا عملت عندك تحليل حمل هنا والنتيجه طلعت إيجابي وده مستحيل يعني فهميني بقي الغلط عند مين؟
الست اللي كانت معاها اتكلمت وقالت طب حضرتك بس ممكن تفهميني ليه مستحيل بس؟ يافندم عمرنا محصل عندنا غلط زي ده حضرتك متخيله اللي بتقوليه ده يودي فداهيه.
هو فعلا يودي فداهيه.
وطلعتلها التقرير بصي شوفي ده بوزيتيڤ إيجابي اهو يعني اي؟
بصو لبعض وقالتلي طيب دقيقه واحده يا فندم.
ودخلو جوه معرفش فين، وطلعتلي البنت اللي سحبت مني وطلبت مني تسحب تاني، وطبعا انا وافقت وقالتلي انها هتطلعلي التحليل بعد عشر دقايق. وفضلت قاعده انا وكريم اللي كان ساكت خالص، ودخلو ناس وخرجت البنت تسحب بردو وكان في شغل والمعمل باين انو شغال وليه زباين.
الناس مشيو وخرجت البنت والست اللي معاها ومعاهم التقرير والأختبار ولقيتها بصتلي وقالت تعالي يافندم شوفي.
قمت بصيت ع الاختبار لقيتها بتقولي اهو يافندم الاختبار بتاعك شرطتين يعني حضرتك حامل.
فضلت ازعق بهستريا ازااااي انتو هتجننوني!
والله يافندم التقرير اهو والاختبار اهو.
مبقتش مستوعبه وعماله ازعق واطلب صاحب المعمل، وكريم ده كله قاعد بيتفرج وفجأة لقيته قام ونتش الورقه مني وكرمشها بأيدو، وطلع خمسين جنيه من جيبو من غير ولا كلمه ورما الورقه ع الأرض وسحبني من ايدي حتي مخدش الباقي وجرني وراه جر ف الشارع.
كريم فيه اي ياكريم؟
مشي.
كريم ايدي اوعي.
امششي.
كريم انا مقدره اللي انت فيه بس خلينا طب نروح لمعمل تاني انا كمان هتجنن.
وفضل يجرني وراه ولا سامعني ووصلنا لحد البيت، وانا شايفه ضحي واقفه هيا وصباح ف البلكونه، وطلع كريم السلم بيا وهو جاررني وراه. وقابلتنا صباح ع السلم
كريم يابني اي كنتو فين تعالي عوزاك.
طلع من قدامها ولا كأنه شايفها، ودخلنا الشقه وزقني جوه ورزع الباب وراه ورما المفاتيح وبصلي بغباء ونظرة شر.
كريم في اي يا كريم بتبصلي كده ليه؟
أويتك واتجوزتك وحبيتك وفضلت كبريائك وغرورك وكدبك علي نفسي، رضيت بضياع كرامتي فالارض عشان تتبسطي.
وفضل يقدم عليا وانا ارجع بضهري لأنه مكنش طبيعي ابدا.
كريم والله مفيش حاجه انا صاغ سليم، يا كريم اكيد في حاجه غلط طب خلينا نحلل ف حته تانيه ابوس ايدك.
فضل وهو مليان غضب وفجأة بصلي بحدة وقالي بكرهك يا غرام، وضربني بالقلم وجري.
انا يدوبك عرفت اقعد، اخدت جمب ع الأرض ودفست نفسي وفضلت اعيط، اي اللي حصل ده بس ياربي؟ وقمت بالقوه اللي باقيه مني ألم هدومي، أو حتي من غير هدوم همشي. ولسه هفتح الباب لقيته ف وشي، بصلي بغضب ودخل ورزع الباب وراه
عاوزه تهربي مش كده؟ عاوزه تهربي زي ماهو هرب زي الجبان. سابك عشان انا هوريكي اسود ايام حياتك لحد ماتموتي بالبطئ.
بعدها بشويه فوقت، قومت اجر نفسي ناحية الباب وحاولت افتحو بس هو قافل عليا بالمفتاح، فضلت اخبط
كريييم افتحلي الباب، كرييييم والله مظلومه يا كريم افتاااااح.
فضلت كده كتير اخبط وانادي ومفيش اي صوت، فضلت قاعده ع الأرض وانا مش قادره اتحرك، وشويه ولقيته داخل وحط قدامي رغيف عيش وازازة ميه. جريت عليه
كريم ابوس ايدك متعملش فيا كده ابوس ايدك يا كريم انا معملتش فيك حاجه وحشه وحياتك عندي.
ضربني بالقلم وقال لسه ليكي روقه.
وفضلت ابكي بدل الدموع دم، ورافض تماما يسمع، وكان من الواضح أن باسم مظهرش وده اللي يأكد الحكايه عليا لانه فاكره هرب. مبقتش باكل غير لقم واترمي ف الاوضه، فضلت ع الحال ده لدرجة مبقتش اقوم من ع الأرض.
قومي اعملي شاي.
كنت مرميه مش قادره انطق.
قوووومي.
حتي مش قادره ارد، خلاص مبقاش فيا حتي قوه، لما لقاني كده سابني قدام باب الاوضه.
فوقت علي جردل ميه مرمي ف وشي، وفضلت أحاول اتكلم بس مش قادره،