الضُرة المجهولة حكـايات مني السيد حصري
ومستشار شاطر جه ضحك عليها ورسم عليها دور الباشا اللي ملوش في العلاقات وفجأة وقع في غرامها؟
ابتلعت المرار اللي مالي زوري. ريقي كان طعمه شياط.
نزلت إيدي على المكتب ببطء، وداريت على ورقة الملاحظات اللي كنت بكتب فيها أسماء الشركات، ورسمت على وشي أهدى وأبرد ابتسامة عرفت أطلعها في حياتي. قناع من التلج والجمود نزل على ملامحي، قناع استغربت أنا نفسي إزاي قدرت ألبسه في ثانية واحدة من غير ما صوتي يترعش.
أنا كويسة جداً يا نسمة... تسلم إيدك. ده بس السكر توّطى شوية من قلة الأكل والتوتر بتاع أول يومين شغل، إنتي عارفة بقى مسؤولية المشتريات والحسابات.
نسمة دخلت وقعدت ع الكرسي اللي قدامي وحطت المشروب يا ستي فداكي الشغل كله! متضغطيش على نفسك، المهم صحتك. ده أحمد دايماً يقولي الشغل يروح وييجي، إنما صحة البني آدم وراحة باله هي راس ماله الحقيقي.
أحمد بيقولك كده؟ سألتها، وأنا مثبتة عيني في بؤبؤ عينها زي الصقر اللي قيس المسافة بينه وبين فريسته.
أحمد ده ملاك يا داليا... والله العظيم مش عشان خطيبي، بس ربنا عوضني بيه عن حاجات كتير وحشة شوفتها. هو بس عصبي شوية اليومين دول ومضغوط عشان البيزنس الجديد، وحتى كريم ابنه واخد كل وقته لما بياخده الويك إند.
الكلمة نزلت على ودني زي ماية نار.
كريم ابنه؟ نطقتها بهدوء شيطاني مريب.
نسمة حطت إيدها على خدها بتأثر أه يا حبيبتي، مقولتلكيش؟ أحمد كان متجوز زمان، جوازة فاشلة من واحدة مكنتش بتقدره وكانت مادية جداً ومفركشة كل حياته، وانفصلوا من سنتين ومعاه الولد، بس هو مش بيحب يتكلم عنها خالص لأنها سابتله جرح كبير، وبيقولي إنتي العوض اللي ربنا بعتهولي بعد سنين القهر دي كلها.
كنت سامعة كلامها، وحاسة بكل خلية في مخي بتصرخ.
أنا؟ أنا المادية؟ أنا اللي سبتله جرح وقهرته بعد ما شيلته من الصفر ووقفت في ضهره وبنيت معاه الطوبة فوق الطوبة؟!
يا حراااام... قولت بهمس، وابتسامتي وسعت مليمتر واحد بس، بس كانت ابتسامة مرعبة ...فعلاً، في ستات معندهاش أصل. بس كويس إن ربنا عوضه بيكي يا نسمة. أحمد يستاهل واحدة زيك... بالظبط.
نسمة اتنهدت بفرحة بريئة حبيبتي يا داليا، ربنا يخليكي. قوليلي بقى، إنتي مش كنتي قايلالي إنك شاطرة في الديكور؟ ما تيجي معايا يوم السبت الجاي نتفرج على الفيلل والتشطيبات؟ أحمد مبيفهمش أوي في ذوق الستات، وأنا حباكي تبقي معايا... إنتي دخلتي قلبي أوي من أول يوم.
بصيت للبرواز اللي على مكتبها اللي باين من الباب المفتوح، وبصيت لكوباية النسكافيه السخنة، ومسكت القلم الفلوماستر اللي في إيدي وضغطت عليه لحد ما صوابعي بيضّت من كتر العصر.
يوم السبت؟ قولت بنبرة ناعمة زي الحرير طبعاً يا نسمة.
ده أنا لازم أكون معاكي... لازم أشوف كل خطوة وكل حتة في عش الزوجية السعيد بتاعكم خطوة بخطوة. ده أنا عندي ليكي ولمستقبلك مع أحمد مفاجأة... عمرك ما هتتخيليها في حياتك.
