ابني حب بنت يتيمة بقلم أماني السيد

كان عايش، كان اتبرأ منك ومن تصرفك الرخيص ده.. تعليقك لشهادتك واستعلاءك على الناس مش هينفعك لما تكتشفي إنك بقيتي لوحدك.. امشي يا هانم وركزي في كليتك عشان تشبعي بيها.
البيت بقى فاضي وموحش، وأنا وبنتي بقينا نقعد قصاد بعض في الصالة المكركبة ندمانين على لحظة استعلاء وكبر، كسرنا بيها قلب بنت يتيمة وأمها الشريفة، فخسرنا قصادها السند الوحيد اللي كان مالي علينا دنيتنا.
بعد ما كل الأبواب اتسدت في وشنا، وأحمد بقى يهرب مننا، ما بقاش قدامي أنا وبنتي غير حل واحد.. الحل اللي كنا بنهرب منه ونعتبره يقل من هيبتنا، بس الشوق لأحمد والندم اللي أكل قلوبنا خلانا ندوس على كبرياءنا المزيف.
مسكت إيد بنتي، ونزلنا المشوار اللي كنا فاكرين عمرنا ما هنمشيه.. مشينا في الشارع البسيط اللي ساكنة فيه هاجر، وكانت رجلينا أتقل من الجبال، وكل خطوة بنقرب فيها من بيتهم، كنا بنفتكر كلامنا القاسي والاستعلاء اللي طلع مننا، فنحس بالخزي والكسرة.
وصلنا قدام بيتهم، بيت بسيط جداً بس عتبته منضفة وزي الفل.. وقفت ثواني أتردد، وإيدي بترتعش وأنا برفعها عشان أخبط على الباب. أخت أحمد كانت واقفة ورايا باصة في الأرض ودموعها في عينها، حاسة بحجم الذنب اللي شاركت فيه.
خبطت خبطتين هاديين.. وبعد لحظات اتفتح الباب، ووقفت قصادنا أم هاجر.
ست بسيطة، وشها بشوش رغم التعب، لابسة هدوم متواضعة جداً، وإيديها باين عليها أثر الشقا والتعب بالحلال.. بصت لنا بذهول واستغراب، وما كانتش عارفة إحنا مين في الأول، لحد ما أنا نطقت بصوت مخنوق أنا.. أنا أم أحمد يا أم هاجر.
ملامح الست اتغيرت فوراً، وظهرت على وشها طيبة الشرفاء وعزة نفس أصلية، ومسكت طرف طرحتها بهدوء وقالت بنبرة راقية ومفيهاش أي غل أهلاً وسهلاً يا أم أحمد.. اتفضلوا، البيت بيتكوا.
ما هانتش علينا نفسنا ولا هان علينا الكرم ده، وما قدرتش أدخل الشقة أصلاً.. وقفت على العتبة، ودموعي كرت على خدي، وبصيت للأم الشريفة دي وقلت لها بصوت مكسور ومشروخ لا يا أم هاجر.. إحنا ما نستاهلش ندخل بيتك ونقعد على كرسيك قبل ما تسامحينا.. أنا جيت لحد عندك النهاردة عشان أقولك حقك عليا، وحق جزمتك فوق راسي.. أنا ظلمت بنتك واستعليت عليها، وعايرتك بشقاكي الشريف اللي المفروض الكل ينحني له احتراماً.. أنا جيت أقولك إني كنت عمياء وقاسية، وبطلب منك ومن ربنا تسامحوني.
في اللحظة دي، خرجت هاجر من الأوضة جوه على صوتنا.. كانت لابسة بيتي بسيط، أول ما شافتنا وقفت مكانها ومسكت في إيد أمها.
بنتي ما استنتش، وقربت من هاجر بسرعة، ومسكت إيدين هاجر وهي بتبكي بحرقة وتتوسل لها سامحيني يا هاجر.. والله أنا كنت عيلة وغبية وأخدتني العزة بالإثم.. أنا اعتذرت لأخويا بس رفض يسمعني، والبيت من غيره بقى مقبرة.. اعتذاري ليكي ولشهادتك ولأمك الفاضلة دي من كل قلبي، ارجعي لأخويا وأنا والله هكون لك أخت وأقل منك في البيت ده!
أم هاجر بصت لبنتها، وبعدين بصت لي وأنا بمسح دموعي وبترجاها بعيني.. الست الأصيلة أخدت نفس طويل، وقربت مني وحطت إيدها الشقيانة على كتفي برحمة وقالت المسامح كريم يا أم أحمد.. إحنا ناس بنعرف ربنا، وما بنشيلش في قلوبنا غل.. شقايا ده هو وسامي وتاجي، وما بخجلش منه، ولما بنتي اتوجعت اتوجعت عشان كرامة أمها.. بس إحنا سامحناكم لوجه الله.
التفتنا كلنا ل هاجر.. كانت واقفة والدموع متجمعة في عينها، بصت لي ولأخت أحمد، وظهرت في عينها طيبة الهندسة وأصل التربية السليمة، وقالت بصوت هادي وراسي أنا مسامحاكم.. ربنا يعلم إني ما كرهتكمش، بس كنت زعلانة على أمي وعلى نفسي.. سامحتكم عشان ربنا، وعشان أحمد اللي ما شفتش منه غير كل خير ورجولة.
الكلمة نزلت على قلبي زي المية الباردة.. أخدت هاجر في حضني وعيطت بحرقة وأنا ببوس رأسها، وبنتي حضنتها وهي بتستغفر.. وفي اللحظة دي بالذات، حسيت إن البيت البسيط ده هو اللي بيعلمنا الأصول، وإن المعنى الحقيقي للمقام والعز مش بالفلوس ولا بالمنظرة.. لكن بالقلوب النظيفة والنفس العفيفة.