اتفاقية الجواز

لو مت قبله كل ميراثي يروحله وأهلي ماياخدوش حاجة... بابا رفع حاجبه. هو كان جاي يتجوزك ولا يشتري شركة؟ ضحكت غصب عني. ماما ما ضحكتش. وشها اتغير. وقالت وهو كان عارف إن المليون نزلتلك؟ قلت لأ. بابا سكت. ماما بصتله. أنا كمان بصيتله. بابا قال الحمد لله. سألته على إيه؟ إنك ماشاورتيشله. لو كان عرف بالمليون الأول، يمكن كان قدملك نفس الورقة بطريقة ألطف. كلامه دخل في قلبي زي السكينة. لأن جزء مني كان عارف إنه ممكن يكون عنده حق. بعد الغدا، دخلت أوضتي. قفلت الباب. وبدأت أشيل حاجات عمر. صور. هدايا. كروت مكتوب عليها كلام كنت زمان بحفظه. فجأة، وأنا بلمهم في كرتونة، الموبايل رن. رقم مش متسجل. رديت ألو؟ صوت ست. ياسمين؟ عرفته فورًا. أم عمر. قلت أيوه يا طنط. سكتت شوية. وبعدين قالت عمر رجع البيت متعصب. ما رديتش. كملت قال إنك رفضتي تمضي. قلت بهدوء أيوه. هو زودها شوية في الشروط، أنا عارفة. وقفت إيدي. زودها شوية. يعني هي كمان عارفة. قلت حضرتك كنتي عارفة بالورقة؟ سكتت. السكون ده كان كفاية. قلت طنط؟ قالت بصوت واطي أبوه هو اللي كتبها. قعدت على طرف السرير. وعمر وافق. هو متربي على كده يا بنتي. الجملة دي عصبتني أكتر من كل اللي حصل. قلت والتربية دي تمنع الواحد يفكر؟ ما ردتش. وبعدين فجأة قالت أنا كلمتك عشان أقولك حاجة. صوتها اتغير. بقى أهدى. وأضعف. ماتوافقيش. اتفاجئت. قلت نعم؟ ماتوافقيش. حتى لو عمر رجعلك. حتى لو قطع الورقة قدامك. ماتوافقيش غير لو فعلا اتغير. سكت. سمعتها بتاخد نفسها. وقالت أنا من يوم ما اتجوزت أبوه وأنا بسلمله مرتبي. في الأول كنت بقول معلش. بعدين بقيت أطلب منه فلوس المواصلات. بعدين بقيت أطلب منه فلوس أجيب هدية لأمي. وبعد كده... صوتها اتهز. بقيت أطلب منه فلوسي أنا. جسمي كله اتشد. كملت مرة أمي تعبت واحتاجت عملية. كنت معايا مكافأة في الشغل. طلبت منه يديني نصها. قال لأ. قال إخواتك أولى بيها. وأمي استلفت. سكتت ثانية. أنا ما نسيتش اليوم ده. ماعرفتش أقول حاجة. قالت عمر مايعرفش ده. هو فاكر إننا عايشين مبسوطين. لأن أبوه طول عمره بيحكي القصة من ناحيته. قبل ما أرد، سمعت صوت راجل من بعيد بتكلمي مين؟ الصوت كان واضح. أبو عمر. أم عمر قالت بسرعة لازم أقفل. وبعدين قبل ما الخط يقفل، قالت خدي بالك من نفسك يا ياسمين. الخط اتقفل. فضلت باصة للموبايل. لأول مرة، حسيت إن القصة أكبر من ورقة. دي كانت دائرة كاملة. راجل عاش عمره مقتنع إن السيطرة حماية. ست اتعودت تسكت. وابن كبر وهو فاكر إن ده الطبيعي. لكن أنا... أنا مش هبقى الحلقة اللي بعد كده. في الليل، عمر بعتلي رسالة بكره هاجيلك البيت ونتكلم قدام أهلك. ما رديتش. تاني يوم الساعة 6 بالظبط، جرس الباب رن. بابا فتح. عمر واقف. لابس قميص أبيض. وشه مرهق. وفي إيده بوكيه ورد. دخل. أنا كنت قاعدة في الصالة. ما قمتش. حط الورد على الترابيزة. وقال ممكن نتكلم لوحدنا؟ بابا قال لأ. عمر بصله. بابا كمل اللي كان هيحصل لبنتي بعد الجواز بقى يخصني. قعد عمر. كان واضح إنه مش مرتاح. بصلي وقال أنا فكرت. ما رديتش. طلع الورقة من جيبه. نفس الورقة. قطعها قدامي أربع حتت. وقال خلاص. مافيش شروط. ماما كانت قاعدة جنبي. بابا قدامنا. أنا بصيت للورقة المقطوعة. وبعدين بصيتله. قلت حلو. وشه ارتاح. يبقى نحدد ميعاد جديد؟ قلت لأ. ملامحه اتجمدت. ليه؟ قلت عشان المشكلة ماكانتش في الورقة. المشكلة إنك كنت مقتنع بيها. اتنرفز. وأنا قلتلك غيرت رأيي. قلت في يوم؟ اقتناع متربي عليه طول عمرك اختفى في 24 ساعة؟ ولا إنت بس خايف أخسرك؟ سكت. سألته لو أنا ماكنتش سبتك امبارح، كنت هتقطع الورقة؟ ما ردش. قلت لو كنت مضيت، كنت هترجع تقوللي معلش؟ سكت. لو ماكنش فيه مقاومة مني، كنت هتشوف إنك غلط؟ صوته علي شوية. كل الناس بتتغير. قلت صح. بس التغيير له ثمن. وأنا مش هتجوزك وأستنى أشوف هتتغير ولا لأ. عمر بص لأبويا. حضرتك أكيد فاهم إن تلات سنين مش حاجة قليلة. بابا رد بهدوء ولا عمر كامل حاجة قليلة. سكت عمر. بابا كمل بنتي تضيع تلات سنين أحسن ما تضيع عمرها. الجملة وقعت على الصالة كلها. عمر رجع بصلي. طب إنتي عايزة إيه؟ قلت ولا حاجة. إحنا خلاص انتهينا. عينيه احمرت. بالسهولة دي؟ ضحكت ضحكة قصيرة. السسهولة دي؟ إنت استنيت لحد يوم الجواز عشان تديني ورقة بتقوللي إني هشتغل وإنت تمسك فلوسي. أدفع في بيت باسمك. أخدمك. أستأذنك عشان أساعد أهلي. ولو اتطلقنا أخرج من غير حاجة. ولو مت أبقى حتى بعد موتي ملكك. بصيتله في عينه. وإنت اللي بتسألني بالسهولة دي؟ ما ردش. قام. أخد نفس طويل. وقال هتندمي. بابا ابتسم. الجملة دي قديمة أوي يا ابني. عمر بصله بحدة. بابا قال جرّب حاجة جديدة. ماما بصت لبابا. وأنا بالعافية منعت نفسي من الضحك. عمر خرج. وقفل الباب وراه بعنف. وبعدها بأسبوع... بدأت المفاجآت. كنت قاعدة في الشغل، لما زميلتي نور قربت مني. قالت هو إنتي وعمر سيبتوا بعض؟ قلت أيوه. طب هو ليه بيقول إنك سيبتيه عشان لقيتي واحد أغنى؟ رفعت راسي ببطء. نعم؟ فتحت موبايلها. ورّتني ستوري نازل عند واحد من أصحابه. كلام طويل. مضمونه إن في بنات أول ما الفلوس تدخل حياتهم بيتغيروا. وفي آخر الكلام صاحبي اتعلم الدرس بالطريقة الصعبة. اتجمدت. عمر عرف. عرف بالمليون. قلت لنور هو عرف منين؟ قالت مش عارفة. لكن أنا عرفت بعدها بساعتين. لما ماما اتصلت. ياسمين. نعم؟ أبو عمر اتصل بأبوكي. سكت. وقاله إيه؟ سأله إذا كان صحيح إنه حولك مليون جنيه قبل الجواز. ضميت شفايفي. قلت وبابا قاله إيه؟ ماما ضحكت. قاله أيوه، وكنت هحول أكتر بعد الجواز. فتحت عيني. بابا قال كده؟ آه. وبعدين؟ ماما قالت أبو عمر سكت. وبعدين سأله ليه بتسأل؟ ضحكت. قاله أصل إحنا كنا هنبقى عيلة واحدة. ضحكت أنا المرة دي. قلت ورد عليه بإيه؟ ماما سكتت ثانيتين. ثم قالت أبوكي قاله ما بقيناش. وقفل. الخبر انتشر بسرعة في عيلة عمر. وبعدها بدأت المكالمات. خالة عمر. عمته. حتى ابن خاله اللي ما شفتوش غير مرتين. كلهم فجأة بقوا عايزين يصلحوا بينا. أكتر جملة سمعتها في الأسبوع ده كانت عمر عصبي شوية بس قلبه أبيض. والجملة اللي بعدها والفلوس مالهاش علاقة. بس الغريب... إن محدش حاول يصلح قبل ما يعرفوا بالمليون. بعد عشرة أيام، حصل شيء ما توقعتوش. أم عمر جاتلي الشغل. لقيتها مستنياني تحت. كانت لابسة نفس الجاكت الأسود القديم. قلت طنط؟ قالت عندك خمس دقايق؟ دخلنا كافيه قريب. أول ما قعدنا، طلعت من شنطتها ظرف. حطته