روايه كاملة للكاتبة سولييه نصار (فرصة تانيه)

لو فضلتي كده كتير أنا هتجوز عليكي يا عبير.
ياريت يا أخي.... ياريت تتجوز وتريحني من قرفك وزنك ده يوم المني... اتجوز يا جمال اتجوز وارحمني.
اتعصبت ومسكت ايديها وقولت: عايزة ايه يا عبير ليه بتعامليني كده أنا عمري ما جرحتك.
بكت وهي بتقول: كلكم جرحتوني... كلكم اجبرتوني اللي أنا مش عايزاه.
أمتي ده... أمتي يا عبير!
لما اتجوزتك يا جمال... أنا مكنتش عايزاك ولا بحبك اصلا... بس هما اجبروني عليك... وأنت عارف كده وبدل ما تتصرف كأي راجل عنده كرامة وتطلقني.
ضربتها بالقلم.... مكنتش حابب أمد أيدي عليها بس هي اللي اجبرتني اعمل كده. أنا عملتلك ايه يا عبير! عملتلك ايه أنا حبيتك أكتر من حياتي... احترمت رغباتك.... رفضتي تخليني المسك ورغم كده انتي بتعامليني بالطريقة دي.
لأن لسه بحبه... لسه بحب كريم.... لا أهلك ولا أهلي قدروا يخرجوه من قلبي.
افهمي يا غبية ... اتجوز أختك وهرب... ازاي تفضليه عليا بعد ده كله.
أنت مش مالي عيني اعملك ايه!
قربت وكنت هضربها بس تراجعت في آخر لحظة وقولت: خلاص يا عبير اللي بيننا انتهي... روحي علي بيتك وهتوصلك ورقة طلاقك... وبعدين سبتها ومشيت.
تاني يوم.
انتي اعبط خلق الله وتستاهلي اللي هيحصلك. قالتها كريمة بنت عم عبير.
مبحبهوش يا كريمة اعمل ايه.
يا شيخة حبك برص... وانتي اللي حبتيه عمل ايه بس... هرب وكسر قلبك وفضحك يوم فرحك لما هرب مع أختك.... نسيتي أن جمال هو اللي ساعدك ووقف معاكي.... اتحمل لسانك الطويل واسلوبك المستفز.... عمره ما هانك ولا جرحك... مينفعش تعاملي إنسان بيحبك بالطريقة دي... هتندمي يا عبير... صدقيني جمال ميتعوضش.
بعد أسبوع.
الباب خبط ففتحت ولقيت عبير قدامي.
افندم عايزة ايه لو بتسألي علي ورقة طلاقك فمتقلقيش هتوصلك قريب.
جمال أنا عايزة آدي علاقتنا فرصة تانية.
مسكت ايدها ودخلتها وأنا بقولها وبشاور علي ريم: نسيت اقولك بعد ما مشيتي أنا اتجوزت ودي تبقي ريم مراتي... لو حابة تيجي وتعيشي وتتقبلي أن ليكي ضرة تمام... مش عايزة يبقي خلاص كل حي يروح لحاله... قولتي ايه.
أنت اتجننت أكيد يا جمال ازاي تقول لمراتك كده ازاي تجرحها كده وازاي تستخدمني في لعبة رخيصة زي كده. بجد مش مصدقة أنك أنت أخويا اللي أنا اعرفه حقيقي مصدومة فيك!!
كانت ريم بتزعق فيا، ريم بنت خالتي وأختي في الرضاعة وصاحبتي المقربة، ريم تعرف كل حاجة عني؛ أسراري وتفكيري واسلوبي. عبير متعرفهاش لأن ريم كانت في فرنسا مع جوزها ومقدرتش تحضر فرحي اللي اتقرر فجأة حتي. كانت لسه بتأنبني وكان باين أنها متعصبة.
انتي بتلوميني علي ايه يا ريم؟ اللي بتدافعي عنها دمرت حياتي. كانت بتقولي في وشي اني مش مالي عينيها. حرقت قلبي وأعصابي، ده أقل حاجة اعملها بعد اللي عملته فيا.
جمال أنت مش كده.
هي اللي خلتني كده يا ريم. متتخيليش قهرتي وهي بتجيب سيرة راجل تاني وبتقولي بكل بجاحة بحبه، لا عملت اعتبار لمشاعري ولا رجولتي ولا لاحترامي. كانت بتهينني خلاص اللي بيننا انتهي.
ولما اللي بينكم انتهي ليه عرفتني علي أساس إني مراتك؟
سكت فابتسمت واتكلمت: أنت لسه بتحبها يا جمال. كنت حابب تشوف غيرتها عليك صح؟
مشكلتي الكبيرة انتي أكتر واحدة بتفهميني عشان كده مقدرتش اخبي عليكي، أيوة أنا كنت عايز اخليها تغير. كنت عايز اقهرها زي ما قهرتني.
اللي بتعمله غلط يا جمال.
هزيت راسي وقولت: صدقيني ده عين العقل. عبير مينفعش معاها ألا كده لازم تاخد علي رأسها بس الأهم أنك تساعديني.
ازاي يا حبيب أختك؟
نكمل في التمثيلية دي.
وليه نكمل فيها ما مراتك مشيت.
هترجع صدقيني هترجع.
تاني يوم حصل زي ما توقعت، عبير رجعت!!!